بذریعہ بینک سونے کی تجارت کا حکم:

بصورتِ مسئولہ ایسا معاملہ جائز اور درست نہیں ہے، وجہ اس کی یہ ہے کہ یہ معاملہ بیع قبل القبض میں شامل ہے جو حدیث شریف سے ممنوع ہے، کیوں کہ جب آپ بینک سے سونا خریدتے ہیں تو بینک کے پاس سونا نہیں ہوتا فقط اتنی مقدار کو آپ کے اکاؤنٹ میں ظاہر کیا جاتا ہے پھر آپ اس کو آگے بیچتے ہیں جب کہ حقیقت میں سونا آپ کے اکاؤنٹ میں منتقل نہیں ہوا لہٰذا ایسا عقد جائز نہیں ہے ۔ ملاحظہ ہو حدیث شریف میں ہے:

عن حكيم بن حزام رضي الله عنه قال: يا رسول الله يأتيني الرجل فيريد مني البيع ليس عندي أفأبتاعه له من السوق؟ فقال: لا تبع ما ليس عندك. (سنن أبي داود: والترمذي، رقم: ۱۲۳۲، وابن ماجه، رقم: ۲۱۸۷).

دوسری حدیث شریف میں ہے:

عن نافع عن ابن عمر رضي الله عنه أن رسول الله ﷺ، قال: من ابتاع طعاماً فلا يبعه حتى يستوفيه. (صحيح مسلم: ۲/۵، باب بطلان بيع المبيع قبل القبض، وصحيح البخاري، رقم: ۲۱۳٦).
قال في الهداية: ومن اشتري شيئاً مما ينقل ويحول لم يجز له بيعه حتى يقبضه، لأنه نهى عن بيع مالم يقبض ولأن فيه غرر انفساخ العقد على اعتبار الهلاك. (الهداية: ۳/۷٤).

جدید فقہی مباحث میں مرقوم ہے:
بیع قبل القبض کی ممانعت متعدد احادیث میں وارد ہوئی ہے، ائمہ مجتہدین نے ان احادیث کو معلول بہ علت قرار دیا ہے، اگر علت پائی جائے گی تو ممانعت کا حکم باقی رہے گا ورنہ نہیں، ائمہ مجتہدین کے کلام میں غور کرنے سے معلوم ہوتا ہے کہ قبل القبض بیع کی ممانعت کی تین علتیں ہیں: ۱ ۔ غرر، ۲ ۔ ربح ما لم یضمن، ۳ ۔ احتمال ربا النسیۂ ۔ (جدید فقہی مباحث: ۱۵/۱٤۱) ۔
(مزید ملاحظہ ہو : اسلام اور جدید معاشی مسائل: ٤/۸۱، و فتاوی دار العلوم زکریا: ۵/۱۱٤) ۔
واللہ سبحانہ و تعالی اعلم