معاوضہ دے کر ترجمہ کرانے پر ترجمہ کے حقوق کا حکم:

جب عمرو نے اپنا کام ختم کر لیا اور پیسے بھی وصول کر لیے تو اجارہ ختم ہو گیا ۔ اب وہ ترجمہ جو عمرو نے کیا وہ زید کا حق بن گیا، اور حقوق مال کی طرح ہیں ۔ لہٰذا عمرو کے لیے اس کاپی کو رکھنا اور اس سے استفادہ کرنا، نیز اس کو آگے بیچنا یہ سب جائز نہیں ہوگا؛ اس میں زید کا نقصان ہے ۔ اور زید کا یہ شرط لگانا اور یہ مطالبہ کرنا کہ وہ فائلیں ختم کر لیں، صحیح اور درست ہے ۔
حضرت مولانا خالد سیف اللہ فرماتے ہیں کہ مال ہونے کے لیے تین بنیادی عناصر ہیں:
(۱) اول یہ کہ وہ شرعاً مباح ہو ۔ (۲) دوسرا یہ کہ وہ شئ قابل انتفاع ہو ۔ (۳) تیسرا عنصر یہ ہے کہ عرف میں جس شئ کی خرید و فروخت مروج ہو جائے، وہ مال ہے ۔ اور یہ کہنا مبالغہ نہ ہوگا کہ فقہ کے چاروں دبستان اس پر متفق ہیں ۔ (جدید فقہی مسائل: ٤/۱۷۱) ۔
مولانا عمر عابدین قاسمی لکھتے ہیں:
پس اس پوری بحث کا حاصل یہ ہے کہ: (۱) جمہور کے نزدیک مال کے علاوہ منافع اور حقوق کی بھی خرید و فروخت ہو سکتی ہے ۔ (۲) اگر بیع کے لیے مال ہونا ہی ضروری ہو تو فقہاء کی عبارتوں پر غور کرنے سے معلوم ہوتا ہے کہ خود مال میں حقوق و منافع بھی شامل ہیں، یہ نہ صرف ائمہ ثلاثہ کا مسلک ہے، بلکہ حنفیہ کے یہاں بھی اس کی نظیریں موجود ہیں ۔ (۳) کسی شئ کے مال ہونے کے لیے عرف و رواج کو بنیادی اہمیت حاصل ہے ۔ (٤) قابلِ ادخار ہونے کی کوئی ایک ہی صورت متعین نہیں، کسی چیز کا قانونی طور پر محفوظ ہو جانا بھی قابل ادخار ہونے کے لیے کافی ہے ۔ (حقوق اور ان کی خرید و فروخت: ص ۱٤۱) ۔
فتاوی دار العلوم زکریا میں ہے:
سوال: حق تصنیف پر معاوضہ لینا جائز ہے یا نہیں؟ ناشر یا مطبع کسی موضوع پر کام کا پروجکٹ تیار کرے اور اس کے لیے اسکالرز کی خدمات حاصل کرے، نیز ان کا کوئی معاوضہ طے کر دیا جائے، جو اس تصنیف و تالیف، ترتیب و تحقیق یا کسی علمی کام کے بدلے دیا جائے، یہ طریقہ زیادہ تر بین الاقوامی شہرت یا فتہ مطابع اور ناشرین کے درمیان مروج ہے ۔
الجواب: حق تصنیف پر معاوضہ لینا جائز ہے ۔ سوال میں ذکر کردہ صورتوں میں سے پہلی صورت کا حکم یہ ہے کہ اس کے جواز میں کوئی کلام نہیں ہے، اس کا حکم وہی ہے جو امامت اور درس و تدریس کے معاوضہ کا ہے ۔ نیز تصنیف ناشر یا مطبع کی ملکیت ہو گی؛ کیوں کہ اس نے اس عمل کی اجرت ادا کی ۔ (فتاوی دار العلوم زکریا: ۵/۳۲۲) ۔
واللہ سبحانہ و تعالی اعلم